PD krijon grup monitorimi për përmbytjet: Ja situata në të gjithë vendin

PD krijon grup monitorimi për përmbytjet: Ja situata në të gjithë vendin

Partia Demokratike ka ngritur një ekip që merr informacione nga të gjitha njësitë administrative dhe po monitoron situatën e krijuar nga moti i keq.

Sipas njoftimit për shtyp të PD-së, nga monitorimi i situatës deri më tani rezulton se në qarkun e Shkodrës nuk raportohen përmbytje, por në disa njësi, si në Rrethina, Shosh, Gur i Zi, Dajç, Ana e Malit mungon energjia elektrike.

Problem kryesor mbeten shkarkimet nga Vau-Dejës. Që nga dreka, në zonën e Obotit e deri në Bërdicë, është rritur niveli i ujit me rreth 1,5 metër. KESH raporton për 500 m3 ujë/sek, por sipas informacioneve shkarkohet mbi 1200 m3/sek.

Në qarkun e Korçës, në Maliq parashikohen përmbytje tek Fusha e Maliqit, tek ish këneta. Reshjet vazhdojnë me intensitet dhe Lumi Devoll mund të dalë nga shtrati. Bashkia Maliq nuk ka marrë asnjë masë, ndërkohë që mungon energjia elektrike dhe qendrat shëndetësore funksionojnë pjesërisht. Në kopshte dhe në shkolla nuk ka ngrohje.

Në qarkun e Gjirokastrës, qyteti i Gjirokastrës i përmbytur në pjesë të veçanta të lagjes së poshtme, nënstacioni i përmbytur dhe për pasojë disa lagje në qytet dhe gjithë fshatrat janë prej 24 orësh pa drita. Qindra hektarë tokë bujqësore të përmbytura në Dropull, Libohovë, Lazarat, Valare, Andon Poçi e Cepo.

Rruga e Viroit kalohet vetëm me makina të larta. Rrezikohet nga përmbytja qendra administrative e Cepos për shkak të fryrjes së Lumit Kardhiq. Janë dëmtuar dhe nuk kalohen rrugët që të çojnë në fshatin Palokastër. Asnjë ndihmë nga shteti e bashkia në këtë zonë. Përroi i Lazaratit rrezikon të çajë digën.

Sipas raportit të PD, më problematike mbetet situata në Mallakastër, për shkak të daljes nga shtrati të lumit Vjosë. Deri tani janë përmbytur 15 ha tokë në njësinë administrative Hekal dhe Kutë.

Ne Sarandë dy pika janë disi problematike, Ura e Gajdarit, ne hyrje te qytetit, per shkak te daljes se lumit nga shtrati dhe zona e Vanes, e Delvinës, ku rrezikohen nga permbytja disa familje dhe bageti.

Në Bashkinë Mat situata është rënduar në disa njësi. Në fshatin Bruc, Prroi i Urakës ka dalë nga shtrati dhe ka shkaktuar dëme në disa banesa, ka shkatërruar plotësisht një biznes peshku, ka përmbytur toka bujqesore.

Në fshatin Urakë uji ka demtuar trupin e rrugës që lidh njësinë Rukaj me pjesën tjetër të Bashkisë.

Në njësinë Komsi, Baz, Derjan janë demtuar disia ura qe lidhin fahatra të ndryshme me Burrelin, në German, Fushëbaz, Rethbaz, Lekhot, Urxallë,

Në Bashkinë Klos ka situatë emergjence. Njesia Xibër është e izoluar nga shkatërrimi i urave. Në njesinë Gurrë dhe Suc ka bllokime të rrugëve nga rreshqitja e dherave

Në Fushë Krujë situata është shumë problematike, por pakësimi i rreshjeve ka ndikuar në rënien e nivelit të përmbytjeve. Në Qarkun Fier problemi kryesor është Vjosa. Niveli i saj po rritet. Në Kashisht, Frakull, Ferras niveli i ujit po rritet dhe vazhdimi i reshjeve i rrezikon seriozisht banorët.

Në Bashkinë Memaliaj ka disa probleme: Njësitë administrative Luftinjë dhe Buz, prej 30 fshatrash janë pa energji elektrike prej 48 orësh. Rrugët që lidhin këto fshatra janë të dëmtuara dhe janë të rrezikshme për udhëtarët. (e.c/noa.al)

www.noa.al – Agjencia Kombëtare e Lajmeve NOA, pjesë e NOA-InfoMedia. Viti i njëmbëdhjetë i transmetimit.
Të gjitha të drejtat janë të rezervuara © 2007-2017 Agjencia Kombëtare e Lajmeve NOA.