U KAP ME MBI 800 MIJË EURO NË MAKINË, AVOKATI: PARATË E JUSTIFIKUARA, SOTA ASNJË DIJENI PËR PATENTAT

U KAP ME MBI 800 MIJË EURO NË MAKINË, AVOKATI: PARATË E JUSTIFIKUARA, SOTA ASNJË DIJENI PËR PATENTAT

Gjykata e Krimeve të Rënda ka vendosur masën e sigurisë "arrest me burg" për biznesmenin Orest Sota, të cilit iu gjetën në makinë 863 mijë euro dhe patentat e ish-ministrit Tahiri.

Në përfundim të seancës, avokati i biznesmenit thotë se klienti i tij nuk kishte dijeni për faktin se patentat e Saimir Tahirit ndodheshin në makinën e tij.

Sa i takon parave që i janë gjetur në makinë, avokati Fatmir Brakaj thotë se ato janë të justifikuara, pasi përdoren për aktivitetin e biznesmenit të familjes.

"Paratë janë tërhequr kesh, pasi janë paguar të gjitha detyrimet e tatimeve. Ne paraqitëm prova në Gjykatë, për rastin. Bëhet fjalë vetëm për para të ligjshme, të Sotës.

Shoferi i ish-ministrit ka pranuar që ka bërë një gabim shumë të madh që ka harruar patentat aty. Sota nuk ka patur dijeni për patentat që ndodheshin në makinën e tij. Madje ai ka shfaqur habi kur policia ka gjetur patentat në makinë.

Ai ka njohje me ish-ministrin. Ka njohje edhe me shoferin e Tahirit, por kjo nuk do të thotë se ka lidhje me patentat që u gjetën aty. Do të ishte mirë që prokuroria të bëjë hetime objektive", u shpreh avokati i biznesmenit Sota. /b.l/noa.al/

www.noa.al – Agjencia Kombëtare e Lajmeve NOA, pjesë e NOA-InfoMedia. Viti i njëmbëdhjetë i transmetimit.
Të gjitha të drejtat janë të rezervuara © 2007-2017 Agjencia Kombëtare e Lajmeve NOA.