Dezertimi i 4 komandove shqiptarë në Angli, ministrja Xhaçka: Rast sporadik

Dezertimi i 4 komandove shqiptarë në Angli, ministrja Xhaçka: Rast sporadik

Afganistani është një ndër vendet më të pasigurta në botë, ku sulmet kamikaze trondisin vendin thuajse çdo javë.

E për të ofruar siguri në vendin e trazuar, që tashmë pas talebanëve përballet me kërcënimin e ISIS-it, që përflitet se ka “zbarkuar” tashmë me të paktën 3 mijë militantë ekstremistë, Shqipëria jep kontributin e saj si pjesë e NATO-s.

Por këtij kontributi për paqen dhe sigurinë në kuadër të angazhimeve që vendi ynë ka marrë si pjesë e Aleancës, nuk i vyen dezertimi i katër komandove në Angli.

Pikërisht për këtë foli nga Afganistani për Top Story-n, ministrja e Mbrojtjes, Olta Xhaçka.

“Është një ngjarje e shëmtuar, por nuk është një ngjarje që të përgjithësojë punën e FA, apo të përgjithësohet me mandatin e parë qeverisës. Është e nevojshme që të gjitha forcat politike të bëhen bashkë kur bëhet fjalë për mbrojtjen e vendit dhe të forcave të armatosura. Gjykoj se nuk duhet të bëhet kalë beteje, aq më pak politik çështje sporadike në FA. Ajo që pamë me katër efektivët, nuk është asgjë më tepër sesa një histori e shëmtuar që nuk mund të përgjithësojë punën dhe arritjet që kanë pasur FA në këtë periudhë, që e shikojmë edhe nga vlerësimet e aleatëve. Ushtria, nuk janë vetëm kontratë dhe janë edhe profesion”, tha Xhaçka.

Edhe Nënkolonel Musa Hita, këshilltar për forcat speciale dhe komando në Ministrinë e Mbrojtjes në Afganistan kërkon që të mos përgjithësohet rasti.

“Më vjen keq që mundi i gjithë atyre që ne kemi shpenzuar në vite atje të shpërdorohet me vepra të tilla. Kjo nuk duhet të përgjithësojë ushtrinë. Janë veprime individuale dhe nuk duhet të kompleksohet me të madhe që ndodhi një veprim i tillë”, u shpreh ai. / Top Channel

www.noa.al – Agjencia Kombëtare e Lajmeve NOA, pjesë e NOA-InfoMedia. Viti i njëmbëdhjetë i transmetimit.
Të gjitha të drejtat janë të rezervuara © 2007-2017 Agjencia Kombëtare e Lajmeve NOA.