“Edhe djali im vdiq si Florenci”, rrëfimi rrëqethës i një babai që mori lajmin e hidhur nga FB

Lajmi i vdekjes së Florenc Beqirajt tronditi gjithë opinionin publik dy javët e fundit, për shkak të rrethanave misterioze në të cilat vdiq i riu.

Ditën e sotme 23-vjeçari nga Shkodra u përcoll edhe në banesën e fundit, ndërsa varrimi i tij dhe ardhja e trupit u shoqërua me protesta dhe reagime të shumta.

Por, njësoj si Florenci, vdekja e të cilit u përcoll m edhimbje për shkak se ishte një i pafajshëm që kërkonte azil në Francë, mësohet se ka humbur jetën edhe një tjetër i ri nga Lezha.

Man Sinani nga Lezha ka treguar se njësoj si Florenci, edhe djali i tij Klaudiani ka humbur jetën në maj të këtij viti e prej atëherë nuk është zbuluar se çfarë ka ndodhur.

Në një rrëfim të gjatë për Opinion.al, babai i të riut Klaudian Sinani që ka humbur jetën njëlloj si Florenci, tregon dramën për vdekjen e djalit.

Babai i cili jeton në një banesë të vjetër në lagjen “Skenderbej” të Lezhës, mezi arrin të sigurojë bukën e gojës për 7 anëtarët e tjerë të familjes.

Por sikur kjo të mos mjaftonte, gjashtë muaj më parë familja mori një mesazh shokues në facebook: “Djali juaj ka vdekur!”, u shkruante një shqiptar i burgosur në Lion të Francës.

Rrëfimi i plotë i babait që kërkon drejtësi për djalin që vdiq në rrethana të mistershme në burgun e Lionit në Francë:

“Më 18 Maj 2017 djalit të madh që kam të shtëpi i erdhi një mesazh në facebook nga një shqiptar (nga Kukësi) që vuante dënimin në Francë. Ai shkruante se “Klaudiani ka vdekur”. Gruas sime i ra të fikët. Mua nuk mu besua. U lidha me nipin në Gjermani se ai kishte disa shokë në Francë dhe ai më tha: “Po Klaudiani ka vdekur në burg”. Më ra si bombë. Si më ka vdekur djali 28 vjeç. Ai s’ka qenë kurrë sëmurë…kush ma mbyti djalin…” (zëri i dridhet)

Herët e fundit që Klaudian Sinani kishte qenë në shtëpinë e tij në Lezhë, ishte Shkurti i 2017. Babai thotë se kishte ardhur për të bërë pasaportën. “I jemi lutur të mos të shkojë më…por iku. Ai ka që në 2012 që endet rrugëve të botës për një të ardhme më të mirë. Dhe heret e fundit u nis me qëllimin për të përfituar azil në Francë. Familja kishte pak dite që kishte mësuar se ishte në burg derisa mori lajmin e kobshëm të vdekjes.

“Më 21 Maj, jam nisur vetë nga Rinasi për në Francë. Më kanë ndihmuar disa emigrantë shqiptarë që dua ti falenderoj. Shkova në fillim në polici aty ku ishte arrestuar Klaudiani. Me këmbënguljen time më dhanë adresën e burgut. Shkova në burgun e Lionit dhe takova drejtoreshën.

Kush ma vrau djalin?- i thashë. Dua kamerat. Më tregoni çfarë ka ndodhur. Drejtoresha më tha se Klaudiani ka qenë në izolim dhe aty s’ka kamera. Më tha shkoni në morg se do bëhet autopsia për tu përcaktuar shkaqet e vdekjes. Shkova në morg. Aty autopsia ishte bërë pa lejen tonë që është shkelje ligjore.

Më 23 Maj arrita të futem në morg e të shoh djalin. Kishte dy shenja pas koke, por mjekët më thanë se s’ka vdekur nga goditjet por nga mbidoza e ilaçeve.

Çfarë ilaçesh- u thashë, unë se kam patur të sëmurë djalin. Nuk të japim asnjë shpjegim tjetër më thanë, prit kur të dalë ekspertiza. Me shumë vuajtje kam arritur ta sjell trupin në Shqipëri dhe për të bërë ceremoninë. Kam marrë 15 mijë euro borxh për ta sjellë djalin të vdekur në shtëpi. Atëkohë kam telefonuar edhe konsullin tonë (emri s’më kujtohet). Më tha do të ndihmoj për lejen e kalimit, por për shpenzimet s’kam çfarë të bëj…

Pas të 40-ve kam shkuar sërish në Francë bashkë me gruan. Kishim sendet e djalit për të marrë. Rrobat e tij, pasaportën. Por mbi të gjitha donim të dinim se si na iku djali ashtu…(zëri i dridhet).

Mora një avokate. Bisedova prapë në telefon me konsullin, por askush nuk po na ndihmonte të mësonim të vertene se si na iku fëmija ashtu…28 vjeç.

Kam pritur disa muaj derisa në nëntor më ka ardhur përgjigja nga avokatja. Ajo tha se kam marrë ekspertizën e mjekësisë ligjore. Letren që më ka çuar avokatja do tua jap edhe ju ta publikoni. Aty thuhet se Kladio ka vdekur nga mbizoda e ilaçeve. Pra mjeku i ka shtuar dozën e ilaçeve. Pse e kanë bërë këtë gjë. Unë jam shtetas shqiptar, por shteti jonë s’merr përsipër asgjë për ti shkuar deri në fund kësaj gjëje. Unë kam paguar avokaten vetem për të siguruar këtë letër. Po më tej kush e ndjek gjyqin e djalit tim? Ne jemi të varfër. Unë kam nxjerr shtëpinë në shitje për të larë borxhet që mora për ta varros djalin. Sot e kësaj dite nuk e di: Pse ma arrestuan? Kush e helmoi? Kush e mbyti Klaudianin?”

Man Sinani kërkon drejtësi për të birin. Ai kërkon që ambasada shqiptare në France ta ndjekë këtë çështje. Ai kërkon sensibilizim, pasi të rinjtë shqiptarë po vdesin burgjeve të huaja dhe askush nuk dënohet. Man Sinani thotë se ishte rasti i Florencit që i kujtoi se edhe ai duhet të ngrejë zërin. I pyetur se pse nuk e kishte denoncuar më herët rastin e tij, u shpreh: “Kam qenë në hallin tim, në mërzinë time, nuk ma ka marrë mendja se duke e thënë në media do të fitoja gjë. Por tani që komunikova me ju ndjehem i çliruar pasi mendoj se si im biri dhe si Florenci ka edhe shumë shqiptarë që vuajnë burgjeve dhe sdua të kene fatin e tyre…”

Bashkëngjitur është letra që avokatja i ka dërguar familjes Sinani, ku thuhet se bazuar në ekspertizën mjeko-ligjore, Klaudian Sinani trajtohej me Metadon dhe Valium. 4 ditë para se të ndërronte jetë i ishte shtuar doza e ketyre medikamenteve. Pra si shkak i vdekjes eshte mbidoza e ketyre barnave.

Siç dimë metadoni u jepet pacienteve qe kane varesi nga drogerat e forta. Edhe Klaudiani mund te kete qene i tillë, pavaresisht se i ati thotë se nuk ka patur asnjë dijeni. Gjithsesi vdekja e tij meriton të hetohet si për çdo njeri tjeter, edhe pse i ndjeri mund te kete qene perdorues droge.