“Mos ma shkatërroni jetën, martohem me 26 gusht” shpërthen në lot i riu që u prangos për 1.3 ton drogë

Policia e Kavajës arrestoi disa ditë më parë 3 persona në fshatin Syrenj pasi u kapën me një sasi të konsiderueshme droge në momentin që u bëri shenjë dy automjeteve të ndalonin.

Rreth 1.3 ton kanabis u sekuestrua nga policia së bashku me 3 automjete të tipit “Fuoristradë”, një furgon dhe një skaf me dy motorë që do të përdorej më pas nga autorët për shpërndarjen e sasisë së drogës.

Personat që u vunë në pranga janë Kejvi Jadari, djali i ish-Shefit të Krimeve në Kavajë Artur Jadarit (aktualisht inspektor në Peqin), RolandHysenbelliu dhe Joni Sadikaj.

Alibia e tre të rinjve në Gjykatë është hedhur poshtë pasi në një dëshmi që nuk qëndron, ata kanë deklaruar se në mjetet e braktisura kishin harruar aparatet e telefonave dhe dokumentet e identifikimit. Të rinjtë shtuan se kishin drekuar në një fshat të Kavajës dhe në mbrëmje kishin humbur rrugën e kishin ndaluar për të pyetur në një postbllok policor se si mund të ktheheshin në shtëpi.

Pronarët e vërtetë të drogës nuk janë zbuluar ende pasi të arrestuarit janë dyshuar si bashkëpunëtorë.

Në pranga kanë rënë gjithashtu edhe 24-vjeçari Arvis Muçaj nga Vlora dhe Aristotel Kasaj.

Muçaj u arrestua në shtëpinë e tij në Vlorë disa orë pasi rezultoi se njëri nga 2 nga automjetet e braktisura në Kavajë ishte në pronësi të tij.

Ai këmbënguli se ia kishte shitur automjetin e tij 5 muaj më parë Erges Sinajt, ndërkohë që ky i fundit kishte zvarritur ditë pas dite aktin noteral të pronësisë së makinës, madje i kishte ngelur borxh edhe 300 euro. Sinaj është një person i shpallur në kërkim policor dhe dyshohet se është organizatori i trafikut të drogës.

E bleva makinën nga Aristotel Kasaj dhe më pas ia shita Ergesit, i lutesha të vinte të bënte letrat, por ai nuk pranonte. Nuk jam marrë kurrë me drogë, të tre ata që janë arrestuar në Kavajë nuk i njoh. Mos ma shkatërroni jetën, më 27 gusht martohem. Nëse del që unë jam i përfshirë në këtë histori më dënoni maksimalisht, por keni përpara një të pafajshëm,-deklaroi i riu në lot në Gjykatën e Krimeve të Rënda.

Ndërkohë që Kasaj, pronari i hershëm i mjetit deklaroi në Gjykatë se ishte në dijeni të shitjes së makinës tek Erges Sinaj, një veprim ky që pavarësisht shumës së paguar nuk është shoqëruar me dokumentacionin përkatës.