Këta janë ekzekutorët e dy të rinjve që trafikonin drogë, rivali i Aldo Bares vrau “Iriqin” e bandës së Lushnjes

Këta janë ekzekutorët e dy të rinjve që trafikonin drogë, rivali i Aldo Bares vrau "Iriqin" e bandës së LushnjesF. Tenolli

Lajme

Ditën e djeshme Lushnja u trondit nga një atentat në mes të qytetit ku mbetën të vdekur dy të rinj dhe u plagosën dy persona të tjerë.

Viktima nga atentati mbetën 22-vjeçari Jurgen Hoxha dhe 23-vjeçari Zamir Latifi, ndërkohë që u plagosë rëndë miku i tyre Marjus Xhepexhiu 26 vjeç.

I plagosur lehtë ka mbetur gjithashtu Bujar Turku 66 vjeç, i cili po kalonte rastësisht me biçikletë në momentin kur u shti me armë zjarri.

Kush janë ekzekutorët e atentatit të djeshëm në Lushnje

Autorët e dyshuar të atentatit të djeshëm të ndodhur në qytetin e Lushnjës janë Laert Haxhiu 25 vjeç dhe Orges Bilbili.

Sipas informacioneve paraprake dyshohet se ngjarja e djeshme lidhet me ngjarjen e datës 25.09.2016 të ndodhur në qytetin e Lushnjes ku është tentuar të vriten me armë zjarri 2 persona.

25-vjeçari nuk është një emër i panjohur për policinë. Ai cilësohet si një nga anëtarët e bandës rivale të Aldo Bares.

Ai kishte 8 muaj që kishte dalë nga burgu për vrasjen e Gerti Salës (anëtar i bandës së Lushnjes me kryetar Baren) i njohur me nofkën “Iriqi” dhe më pas u arrestua sërish në vitin 2015 për trafik droge.

Ndërtimi i skenës së ngjarjes

Ditën e djeshme rreth orës 14:20 të drekës, në vendin e quajtur “Urra e Përroit”, është shtirë me armë zjarri nga persona ende të paidentifikuar drejt disa të rinjve. Atentati ka ndodhur vetëm pak metra larg komisariatit të policisë Lushnje.

Arma e përdorur në këtë atentat është kallashnikov dhe mendohet se shënjestra të atentatit kanë qenë dy viktimat.

Zamir Latifi dhe Jurgen Hoxha kanë qenë të ulur në një bar-kafe në pronësi të Marjus Xhepexhiut, me vendndodhje në lagjen "Loni Dhamo" në Lushnje.

Janë dy versionet e kryerjes së ekzekutimit

I pari është se atentatorët kanë shtirë nga një automjet në lëvizje drejt shënjestrave me breshëri kallashnikovi. Mendohet se plumbat kanë ardhur nga të paktën dy persona në sediljen e pasme të pasagjerit.

I dyti, sipas disa dëshmitarëve të ngjarjes është se një person i maskuar ka zbritur nga automjeti me një kallashnikov në duar dhe pasi ka ecur 20 metra ka hapur zjarr ndaj Jurgen Hoxhës dhe shokut të tij Zamir Latifi.

Gjendet i djegur automjeti i atentatorëve

Pak minuta pas ngjarjes, përgjatë aksit rrugor Lushnje-Berat, pranë fshatit Çukaj u gjet i djegur automjeti i atentatorëve.

Policia gjeti në brendësi të automjetit tre armë zjarri kallashnikov, të cilat dyshohet se janë përdorur në atentatin e djeshëm në Lushnje.

Pistat e hetimeve

Pista e parë, pazaret e drogës

Një vit më parë ndaj viktimës së djeshme Zamir Latifit, Xhuljo Shkurtit (djali i motrës së Aldo Bares) dhe mikut të tyre Sajmo Xhelilit iu është bërë atentat me breshëri automatiku.

Në këtë atentat mbeti i plagosur në këmbë Xhuljo Shkurti dhe Sajmo Xhelili.

Sajmo Xhelili dhe Xhuljo Shkurti kanë lidhje familjare mes tyre dhe një nga pistat ku po hetohet është trafiku i drogës në Belgjikë dhe Holandë.

Jurgen Hoxha një prej viktimave të mbrëmshme jetonte me periudha herë në Lushnje e herë në Holandë. Miku i tij viktima tjetër e atentatit Zamir Latifi jetonte me periudha të ndryshme në Itali dhe dy të rinjtë kishin vetëm disa ditë që kishin ardhur në Lushnje.

Pista e dytë, hakmarrja

Burime nga grupi i hetimit konfirmuan mbrëmë se ngjarja dyshohet të ketë motiv hakmarrjen, duke mos përjashtuar edhe një rizgjim të bandave të Lushnjës që i kanë nisur hakmarrjet që prej më shumë se 20 vitesh.

JOQ.al