Fyerjet nga Rama, reagon Shoqata e Gazetarëve Profesionistë: Intimidim ndaj mediave

Fyerjet nga Rama, reagon Shoqata e Gazetarëve Profesionistë: Intimidim ndaj mediave

Shoqata e Gazetarëve Profesionistë të Shqipërisë dhe Lidhja e Gazetareve të Shqipërisë, reagon pas fjalëve fyese që Kryeministri Edi Rama, adresoi sot ndaj gazetarëve.

Kjo shoqatë shpreh shqetësimin e indinjatën e thellë për sulmin dhe ofendimet e Kryeministrit Edi Rama ndaj mediave sot më 25 tetor 2017, pas përfundimit të seancës plenare, ku shumica qeverisëse votoi kundër kërkesës së prokurorisë për arrestimin e ish ministrit të tij të Brendshëm Saimir Tahiri, i përmendur në përgjimet e drejtësisë italiane, mbi një organizate shqiptaro-italiane të narkotrafikut.

Në deklaratë thuhet se kjo është një sjellje e përsëritur e Kryeministrit ndaj mediave, por këtë herë, sulmet verbale të Kryeministrit, kishin tone të papranueshme intimiduese.

Më tej nënvizohet se siçce deklaroi vetë, me zë e figurë e në transmetim të drejtpërdrejtë televiziv, Kryeministri Edi Rama kishte dalë për t’u marrë me gazetarët duke i ofenduar me një gjuhë të padenjë. “Kam dalë për ju sot, për ju dhe kokat tuaja që ju torollisin atje në kazan” tha Kryeministri që doli vetë për të komunikuar me mediat pas seancës, ndërsa epitetin “kazan”, e përdor si eufemizëm për median në mënyrë sistematike.

“Në një shpërthim të papritur, komunikimi në transmetim të drejtpërdrejtë televiziv i Kryeministrit ndaj mediave përmbante frazat “Ju përçoni si tel bakri, që as logjikon, as kupton”, “turp për të gjithë ju dhe ata si ju, që ende nuk e keni kuptuar se për çfarë bëhet fjalë, e vazhdoni të torollisni miletin me këto pyetje pa pikë sensi”; “pyetjet tuaja burojnë nga padituria, jeni kaq të paditur”, “ju jeni për të qarë hallin” , “flisni përçart”, “Këto janë pyetje për të qarë hallin”, “kjo është një idiotësi, në këtë pozitë idiote me vë ti me pyetjen tënde”, “jeni një amplifikator thashethemesh i paparë”, “ju duhet t’i thërrisni mendjes”, “s’keni si ta kuptoni ju, që për fatkeqësinë tuaj nuk lexoni”, “është e drejta jote te besh rolin e budallait”, thuhet më tej.

Shoqata e Gazetarëve Profesionistë të Shqipërisë shpreh shqetësimin e thellë për ofendimet dhe intimidimin që u bëri Kryeministri i Shqipërisë Edi Rama mediave sot.

Në vijim u bëhet thirrje, partenrëve ndërkombëtarë, Federatës Ndërkombëtare të Gazetarëve dhe Federatës Europiane të Gazetarëve në Bruksel, çdo organizate që merret me median e të drejtat e njeriut në vend dhe të gjithë trupit diplomatik në Shqipëri që të reagojnë në mbështetje të medias, “e të na ndihmojnë të ndalojnë këtë sjellje të përsëritur të Kryeministrit ndaj pushtetit të katërt”.

Në vijim deklarohet se nuk është faji i medias që drejtësia italiane ka arritur të përgjojë narkotrafikatë shqiptarë, kushërinj të largët të ish ministrit të Brendshëm të qeverisë, duke e lakuar emrin e tij si përfitues të aktivitetit të tyre.

Po ashtu thuhet se nuk është faji i medias shqiptare që prokuroria e krimeve të rënda të Shqipërisë ka nisur hetimet dhe i kërkoi kuvendit arrestimin e ish ministrit të brendshëm.

“Nëse media bën pyetjet që nuk i pëlqejnë, Kryeministri ka gjithë të drejtën të mos përgjigjet, por jo të dalë enkas para tyre, për t’i ofenduar e intimiduar mediat për punën që bëjnë, atë që i takon, mbulimin e kësaj ngjarje që ka shqetësuar kaq shumë kryeministrin”, deklarohet në mbyllje. /a.y/noa.al

Rama shpërthen ndaj gazetarëve: Turp t’u vijë, as lexoni, as kuptoni, flisni përçart

Fyerjet ndaj gazetarëve, Kryemadhi bën deklaratën e fortë: Nën efektin e drogës

Gjuha fyese e Ramës ndaj gazetarëve, Basha: Në çekuilibër psikik, dhunë ndaj kujtdo

www.noa.al – Agjencia Kombëtare e Lajmeve NOA, pjesë e NOA-InfoMedia. Viti i njëmbëdhjetë i transmetimit.
Të gjitha të drejtat janë të rezervuara © 2007-2017 Agjencia Kombëtare e Lajmeve NOA.