Lajme
E masakruan me thikë për një karikues, ky është autori dhe bashkëpunëtorët e tij
Në sherrin për motive banale që ndodhi natën e mbrëmshme në kryeqytet, ku mbeti i vrarë 22-vjeçari Marvi Mihali, vazhdojnë hetimet për zbardhjen e ngjarjes.
Policia ka nisur krehjen e zonës për gjetjen e mjetit prerës me të cilin u plagos 22-vjeçari, i cili ndërroi jetë më vonë në spitalin e Traumës në Tiranë.
Ai u qëllua me thikë në afërsi të stadiumit “Dinamo” dhe pasi e plagosi rëndë, autori Eugen Bitraj e ka hedhur mjetin e krimit pranë lumit “Lana”.
Forca të shumta policie janë angazhuar në gjetjen e mjetit me të cilën mbeti i masakruar i riu.
Shkak për sherrin, burime për JOQ.al bënë të ditur se u bë një karikues telefoni. Marvi kishte blerë një telefon nga Dejvi Bitraj dhe i kërkonte edhe karikuesin e tij dhe aty ka nisur përplasja që çoi në fundin fatal.
Sipas BW, pasi të rinjtë kanë nisur të zihen 19-vjeçari Dejvi Bitraj e ka tërhequr Marvin jashtë lokali, pranë një makine. Aty ka thirrur në ndihmë djalin e xhaxhait të tij, Eugenin i cili ka nxjerrë armën e ftohtë duke e qëlluar me thikë 22-vjeçarin. Pasi e kanë futur në kënd, në ndihmë i kanë shkuar edhe 2 shokët.
Në përfundim të veprimeve të para hetimore është bërë arrestimi si autor i ngjarjes:
– Eugen Bitraj, 24 vjeç, banues në Tiranë.
Si dhe janë arrestuar si bashkëpunëtorë në krim:
– Dejvi Bitraj, 19 vjeç, banues në Tiranë.
– Kridens Alla, 19 vjeç, banues Tiranë.
– Marsel Alla, 23 vjeç, banues Tiranë.